LGN 29/10 Anndaama caggal kuraaji hol fotɓe hawrude to kawgel Afrik fukubal baɗowel to Gaboŋ e Gine Ekuwatoriyaal. Senegaal woni ko e goomu A ɗo ina tawee : Gine Ekuwaatoriyaal  gadanol mum, Libi tawtoraaɗo laabi 3 e Sammbi tawtoraaɗo laabi 15. Udditta kawgel ngel ko Gine Ekuwaatoriyaal e Libi, caggal ɗuum ko Senegaal fatta kihondiral mum gadanal e Sammbi.

Kuraaji ɗii ko ɗum ɗoo ndokki ! 

LGN 15/10 Caggal fitina e haala keewka e wuro Bamako laamorgo Mali, to sukaaɓe rewɓe fuki kaggu (basket) ɗaminanoo maa naw araa-raay, jooni wonti ko pooɗee nduure hakkunde ɓeen fettooɓe e ardiiɓe goomu basket oo.

Ɗum waɗi hooreejo leydi Senegaal hono Wadd itti jaagorɗo kalfinaaɗo coftal ɓalli tottii ɗum Abdullaay Maktaar Joob garɗo e maɓɓe ko ɓooyaani.

Baaba mum Kariim Wadd waɗii ko heewi waɗde, so rottude gila defnooɗo artaani. Ndeen jaagorgal kalfinaangal coftal ɓalli hono Fostee Jaata artaani njillu mum tawo etee ina woni e pooɗee nduuree hakkunde mum e sukaaɓe waɗooɓe fuku junngo kaggu (basket) e gardagol Baaba Tañnjaa, ɗoon e ɗoon o itti mo, o lomtini ɗoon Abdullaay Maktaar Joob gonnooɗo jaagorɗo kalfinaaɗo golle e mbaylaandi mum.

LGN 31/07 Leydi Senegaal heɓii ko weeɓaani so jeyeede e goomu pettondiral ɓurɗo weeɓde e nder kawgel fuki 2014 ngel fettondrta e mum leyɗeele aduna ɗe. Daawal gadanal, Senegaal won'di goomu ko leyɗeele Anngolaa, Uganndaa e kala nawɗo raay hakkunde leydi Moris e Liberiyaa.  Mbela Senegaal maa ɓennu daawal gadanal ngoo fetto wolla maa ngootiri e ɗee leyɗeele sur ɗum gila yettoyaaki Bresil?

LGN 14/04 Cosaan so majjii e Fuutaa wonaa e Duungal. Hannde ñande 9 e 10, fedde jokkere enɗam Duungel yuɓɓinii lammba mawka e dow araa-raay Hammadi Wuuri Gay gonnooɗo mbir mawɗo e nder ndigire.

Oo kikiiɗe aset e alet waɗii finnde haaleteende duuɓi keewɗi; wonaa geew tuŋngaaɗo hakkunde Hammadi Aali e Usu Bah, wonaa ɓilal Ablaay Muudo sokki Boo Tokosel; wonaa cowtiiji Muusaa Alfaa wonaa leewe Garɗo ko Kootoowo; wonaa sobo bojo mbiryon leewii caggal lammba wonaa ñaaƴo dokollaaji jokolɓe e yontaaɓe Duungel. Hay huunde ŋakkaani!

Aset oo ruukii, sabu punndi ƴerdii e bawɗi e nder dingiral ɗoon ɗo Ablaay Muudo Bah fooɓnii Boo Tokosel to Gede e leydi. Sippiro hakkude Hammadi Aali Sall e Usu Bah waɗii soobo yoobo sabu alaa fof e ɓile e pooɓne ɗe njiyaaka ɗoon kono Hammadi waɗtindii ko jooɗtaade e Usu Bah. Iboo Sih waɗiino yaakaar no feewi e nder geew oo kono Muusaa Alfaa Njaay yaraani kedde; Ko Muusaa liɓi caggal bokal muusngal.

LGN 08/04 Duungel addii feere hesere ngam wallitde mahngo duɗal wuro. Hol mo wiynoo lammba ko fijirde coolooji? Maa a taw joom mum yahaani Duungel. Wuro ngoo rentii ngam yuɓɓin’de lammba mawka sabu yiɗde mahtaade kuɓeeje duɗal jaŋngirgal wuro ngo.

E nder ɗuum, ɓesngu Duungel ina fiya lammba ñande 09 e 10 Awriil , tawi ko e innde araaraay mbir mawɗo biyeteeɗo Hammadi Wuuri Gay, jeyaaɗo to Duungel.

E nder heen sippirlooji mawɗi maa mbaɗ toon kono ko ɓuri teskin;de ko ko hakkunde: Hakkunde Boo Toksel laaɓa juuɗe to Gede e Aamadu Dummbiya mo Ngijiloñ; Hakkunde Aali Sal to Daande Geloonga e Usu Bah to Jowol Saare; Sammbayal Joob to Gede e Muusaa Alfaa Njaay to Wudduru; Hakkunde Baylaa Maar to Ceenel Saahooɓe e Garɗo ko Kootoowo to Ngijiloñ.

LGN 26/03 E fetto fuki koyngal hakkunde Senegaal e Kameruun, barooɗe conngii fettooɓe Kameruun. Go’o e ndiga (1-0) e naato Demmba Bah tawii seɓɓitoyii haa hojomaaji 92. Dum waɗi ko e keewal sabu dingiral Leopold Sedaar Seŋngoor ngal heew haa wukkuti yeeɓooɓe.

Kawtal hakkunde Senegaal e Kameruun kulanooɗo no feewi, wontii jam, kisal e mbelamma. Senegaal fiyii Kameruun go’o e ndiga (1-0). Nde ɓe puɗɗii, mbiyen e hojomaaji gadani Senegaal ɓurnoo hollitde coftal e petto moƴƴo, kono nde yahnoo haa ɓooyi, Kameruun waawti Senegaal haa laaɓani mo woni kala won’de doole potaani.