LGN 11/01 Iwdi Ñanndaan, koreeji, hoɗdiiɓe e sehilaaɓe Mbasu Niang waɗii jemma siyaara ciftoor nguurndam e golle Mbasu Niang. Siyaara oo waɗi ko e ndee yontere maaynde e dingiral tolno galle Umaar Niang ɓurɗo anndireede Mbasu dutiiɗo e joom mum ko ɓooyaani ko.

Siyaara Mbasu Niangŋ ! Mo nannoo jemma ciftoor nguurndam Mbau Niang fof maa sikku ko jemma kelle, buubaaji e wanngo, kono oo jemma ko mo diine e ciftoor Geno joom baawɗe. Addi ɗum e konngol gooto e wuurdunooɓe e Mbasu hono Aliw Badara Sall ko yeeso woɗngo ngo Mbasu anndiranoo, so darnde makko e diine Islaam.

LGN 03/11 Ladde anndaa ɓiɗɗo moƴƴo kono ɓiɗɗo moƴƴo ɗo woni fof ina anndi hoore mum. Ngurndam Pullo dahanooɗo e laamu tuubakiri ngam maccinoyeede, nootortooɗo e innde Umaar Ben Sayiid winndaama e kuɗol Dr.Ala Alryyes to duɗal jaaɓi haaɗtirde mawngal Yale University.

Umaar Ben Sayiid ko pullo, joom diine jeyanooɗo e nder Fuuta Tooro mo laamu tuubakiri dahnoo balɗe 4 hade Abriham Lincoln siifde sarɗi kaɗtuɗo julawu maccungaagu e nder Amerik no diidorinoo (The proclamation of Emancipation).

Umaar Ben Sayiid jibinaa ko e hitaane 1707 to Fuuta Tooro, o saŋkii ko e hitaande 1864 e nder dowla North Carolina e nder dowlaaji dennduɗi Amerik tawii o mo yahra ko e duuɓi 94 tawii hari ngam taƴde callalle maccungaangu (civil war) nana gasa kono o meeɗaani taweede oon ñalawma. Ko toon yanaande makko woni e nder ladde North Carolina; etee o accaani ɓiɗɗo.

LGN 11/07 Hono no Baaba Maal fiilirano jaalal leñol nih, hono no Sammba Demmba Jaaƴe fiiliranoo mawɗo ñeeñɓe e nder duuɓi cakkitiiɗi ɗi, ko hono heen Farba Salli Sek ne fiilira hannde jaalal leñol. Teddungal mawngal waɗii e Ndakaaru; Farba Salli Sek fiilaama jaalal leñol e teddungal janngooɓe fulɓe duɗal jaaɓi haaɗtirde Seek Anta Joob (UCAD).

Rowane ko fedde wonnde fiilnoo Baaba Baydi Maal, hikka noon ko fedde janngoove fulɓe DENTAL/UCAD fiili Farba Salli Sek ngaal teddungal. O fiilaa ko e yeeso diɗɗal fulɓe haa heewi e yeeso kadi terɗe laamu e jaayndiyankooɓe. Farba fiiliraa ko sabu heɓtin'de ngenndiankaagal mum e darnde makko e nder pinal renndo fulɓe. To bannge balle e golle, Farba gawlo wonaa sara heen.

Peeral 16/05 Ittude Fulfulde nder Media ko warude ɗemngal men tippude e eɓɓoore nde Ardiiɓe men Fulɓe jaɓi (1) 

Ñannde 27 lewru yawtundu (27/04/2011), Md Usmaan Bah winnduno ɓatakuru faade e forum Tabital Pulaaku no innee Jamaa, himo lamndoo ko waɗi Fulfulde jantaaka e ɗemɗe Afriki mawɗe ɗen, ɗum ko e ndee jaaynde wi’eteende Jeune Afrique lollunde (JA) e ngoo hello, ko nii o wiiri “Hannde miɗo jannga ka internet (jeune Afrique:  e ngoo hello ɗo) mi hawri e lowre fii halaaji yewteteeɗi Afriki ɓe waaɗaali pulaar/fulfulde e nder ɓuraaɗi anndeede ɗin, tawa non ɓe waɗii hay Moosinkoore, haala wowleteeka Burkina tun…”.

LGN 13/04 Duuɓi 4 nguurndam e gollal rajo haayre laaw waɗii finnde to Brooklyn e nder New York e dow gardagol Hammel Tuure oo talaata 12 April 2011. Rajo Haayre Fulɓe International yuɓɓinii jemma weltaare e dow teddungal pulaagu New York e gure catiiɗe ɗum. Yimɓe ngummiima haa e gure catiiɗe, won heen noddi ɓeya nuldi balle mum en gila Sidney haa Misouri. Ko ɓurnoo teskin’de ko goomu mawɗo gummiiɗe Filaa e gardagol Gerngal Njaay e goomu Baltimore (327 kiloo) e gardagol Aamadu Sammba Daat, ngam nootaade jemma oo.

Jemma oo e njenngude fof, o waɗii faayiida haa ko ina wiyaa o mo jeyaa e jemmaaji pulaagu ɓurɗi welde e teeyde e nder filla New York. O fuɗɗorii ko njettoor Rajo Haayre fayde e pelle toŋtuɗe ɗum e oo jemma haa arti e Uwa Law Group, Lewlewal Group Networks, BHS (Booñ Koɗki mo Senegaal), Fuuta Business Solutions, Franklin & Fulton Services e Kisal Shipping.

LGN 08/04 Duuɓi sappo ngonaa balle sappo ! Hikka waɗi duuɓi sappo ko jaayndiyaŋke mawɗo hono Alhajji Tijjaani Aan ruttinoo e joom mum. Ngam siftorde e mawnin’de golle ooɗo gorko mawɗo, jaalal e katante leñol, daraniinooɗo potal e ɓamtaare ɗemɗe ngenndiije, sehilaaɓe e yiɗɓe Tijjaani Aan ina njogori waɗde kawtal mawngal. Ngaal kawtal waɗata ko e wuro Ndakaaru to fuwaar (Cices) 11 e 12 lewru awril, ñande 13 e 14 lewru awil to Gamaaji Saare kañum e  Njum.

Mo waɗi ko moƴƴi kala maanee haa caggal maayde! Mo wuuri nafaani so maayi woyaama ne ko yahdude e ñamaale janae woyraa kono wonaa barke. Kono Abuu ɓurɗo anndireende Alhajji Tijjaani Aan, jaayndiyaŋke mawɗo e aayaawo habrirde Senegaal hono RTS ruttinooma e joom mum gila e hitaande 2001, ñande aset 14 lewru Awril. O yiyi aduna ko e 1955 to Gamaji Saare (diiwaan Podoor). Duuɓi sappo ko oo gorko ɗemɗiyaŋke, ngenndiyake suddii leppi leydi tedduɗi. Gila ndeen haa jooni e kala hitaande pelle yiɗɓe Tijjaan Aan, ko wayi no Rathadew, Baawal, Sehilaaɓe Tijjaan Aan, e Senegaal, Muritani e leyɗeele catiiɗe Senegaal ina ciftora mo. Hitaande kala ko silkeeji, jeewtere e juurle o waɗantee.