Lewlewal Group Networks (LGN) ||| kabaruuji Fuuta e Winndere |||
 Amerik baŋkii: Senaat hawraani e eɓɓo bata 2011 |
| Bamako: Koola Njaay warii debbo mum, ubbi e nder suudu |
| Mali: Laamu Kuluba saltiima manaaji dalli |
| Suɓngooji 2011: Lanndaaji Mali ndewii feere Benno Siggil Senegaal |
| Mali: Fulɓe 30 mbaraama toon, 1000 ndiiwaama |
| Written by Issaga Jalloh on Friday, 01 June 2012 20:45 |
E haala goforneer (gouverneur) Bukari Kalil Bara, hare ndee waɗi ko wuro ina wiyee Sari e nder leydi Mali fotde kilooji 15 hakkunde mum e keerol Burkina. Hare nde noon waɗii maayɓe 30 , kamɓe fof fulɓe; ina heen galleeji kuurɗi tawaaɗi e koɗki mum’en e nder ladde. Won heen nduppaa ko ina nguura, ɗacciraa noon e ladde yoolombere. Duppi ɗum’en ko remooɓe Dogon en.
Bone ficcat laaci! Addi hare nde, ko gila e nder laamu Aamadu Tumaani Tuure, lappi jaajɗi mbaɗanooma ngam yoo aynaaɓe taƴtir kolaaɗe tawa ñaayaani gese janane e nder leydi Dogon en. Gila nde laamu Mali lelnata ngaal kuugal noon, Dogon en ina tuumi hooreejo leydi oon saha hono Aamadu Tumaani wuuranaade aynaaɓe fulɓe. Caggal nde laamu Aamadu Tumaani yani, remooɓe Dogon en nguddi yoga e lappi ɗi, wolla kam ndemi gese e hakkunde e won e lappi. E nder heen jawdi fulɓe eggoori rewnoondi e nder lappi he ñaayi won e gese demanooɗe e dow heen. Ko e nder heen hare waɗi hakkunde remooɓe e aynaaɓe haa waɗi gaañiiɓe e maayɓe. Ko oon yopto-yopto addi haa remooɓe Dogon en pelliti yan’de e bille aynaaɓe, mbari heen 30, nduppi galleeji, ndiiwi heen ko ina abboo e ujunere neɗɗo, keɓti jawdi mum’en ndariindi. Hannde oo noon laamu Mali neldii toon kooninkooɓe ngam ustude tooke e dartin’de fitina. Binndol Isaaga Jalloh, Lewlewal Group Networks, www.mbiimi.com Lewlewal Group Networks ina yetta yillotooɓe mbiimi.com. Miijooji mon e binndanɗe ɗe ina walla min wuurtude golle e coklaandi renndo ngoo. Tiiɗnoɗen e hokkude miijooji men e dow needi, hakkilantaagal e muñal jahdungal e yiɗde ɓamtude golle men. |
LGN
Honde ɗum iwanta fulɓe tawee? Kala to njahruɗaa e nder Afrik; fulɓe ina mbaree ndiiwee e leyɗeele mum en, tawa kadi hay mbuubu ɗojjatah, elle fulɓe kam ko arani en e nder Duunde Afrik, walla tagiraa ko yoo leeɓto tan!! E miijo am fulɓe potii hankadi yuɓɓinde pelle kaɓtatooɗe jogatiiɗe tawa kadi ko njongitaaje keewɗe nooneeji, to pullo memaa fof ɓe njaha ɓe mballoya ɗum, tawa kadi fedde wonnde jaŋnguɓe loyi ( sariyaaji) ina ngoodi ngam hujjinanaade fulɓe nder ñaawirɗe...