| Seriñ Seek Beeco Cuun, ceerno mo rewɓe 7 |
Diine wiyi ko nayo, Beeco wiyi ko ɗo ngoraagu haaɗi kala. Hannde o mo yahra e rewɓe njeeɗiɗo. Njeeɗiɗo…. E dow hoore ceerno Beeco. Veen ngoni: Sokna Mboose Juuf, Sokna Ayse Maam Kan, Sokna Ayda Jallo, Sokna Batoor Caam, Sokna Maam Buso Seen, Sokna Maam Buso Juuf, Sokna Sali Pen... ina sikkaa maa jokku e yahde so tawii kay kasoo dartinaani. Kono hol ɓee rewɓe rewɓe e ceerno? Jeewo Galle: Sokna Mboose Juuf wolla mbiyaa Meer Mboose, o kañum tigi woni jeewo galle Seriŋ Seek Beeco Cantakun mo Madiina Tul Salaam. O renndii e ceerno nguurndam hannde ko ina abboo e duuɓi 40. Ko o saalum-saalum-naajo baawɗo seedtaade ñalɗi Beeco gila o suwaa tawo waɗeede Seeh ( mukaddam ) e laawol murid ko adii 1987 e junngo Seriñ Saaliw. Lemmbel Beeco Cuun: Oo ɗoo debbo boɗeejo ko pullo e iwdi mum. Ko leydi Muritani o jeyaa e diiwaan Tooro. Hannde o o ɓuri lollirde ko Sohna Ayse, ko o depitee to suudu sarɗiiji gila 2007. Oo debbo pullo jannguɗo ko fayti e cellal ɓanndu yiyondiri e Seek Beeco Cuun ko to kawlak gila e duuɓi 1970 pawɗi. O resi mo ko 1980 tawii o mo yahra e duuɓi 32. Sokna Ayse Kan e Sokna Mboose Juuf koɗdi e galle gooto to leegal ina wiyee mermoos maa won jooni duuɓi limtinɗi. Tataɓel Seek Beeco Cuun: Ko Sokna Ayda Jallo, pullo jeyaaɗo to Dagana yani e jarabi Seek haa laatii tataɓel galle. O jibinaa ko 1979, etee ko almuudo makko o wonnoo ko adii nde o wonata joom suudu makko kadi ko kanko ɓuri waawde won’de e sara Beeco sabu nde njiiɗaa Beeco fof, ina gasa tawa Ayda ina ɓadii ɗoon. Ayda ina anndiraa yiɗde mum comci ñaantorɗi, ñarungal peɗeeli haa hay moorli e gerefaasuuji makko ceerataa e haaleede e saloŋaaji rewɓe sahaa fof. Jaraa boom, ko debbo ceerno! Nayaɓel Beeco: Oo ɗoo debbo diriyanke biyeteeɗo Sokna Batoor Caam jibinaa ko 1980 to Cees. Ko o jannguɗo sabu o heɓi bakkaloriyaa makko ko 1999 to duɗal Blaise Diagne. O jokkoyi jaŋde makko ko to duɗal jaaɓi haaɗtirde Gaston Berger to Ndar. O yaltidi toon ko e seedamfaagu toowngu (maitrise en droit) e hitaande 2OO3. Joyaɓel Seek Beeco: Ko suka debbo biyeteeɗo Sokna Maam Busoo Seen udditani rewɓe Beeco heddiiɓe ɓee fof laawol. So diine jaɓii wolla saliima, ko kaŋko tigi waɗi. Dewgal makko e Seek Beeco Cuun habaaka, waynaaka, ejaaka, hiir tan humaa. O ummorinoo ko marok lebbi seeɗa caggal gargol makko, Seek Beeco yuɓɓini mawluud mo o waɗata to Bustaan ( mbour) wonannde jaayndeeji kabruɗi ɗum. Ko e oon jamma Beeco yiyi mo, humani mo kanko e jeegaɓiijo o. Ko dewle maɓɓe kumdaa e jemma gooto. Kanko Maam Buso Seen oo noon o wiyi Seek ko o hoyɗii Seriñ Saaliw. Ko ɗoon Seek jaabii mo, ɗoon ko annoore dewgal hakkunde maɓɓe. Ko ɗoon dewgal ngal yiilaa hoppaa. Jeegaɓel (Lemmbel ɗiɗmel): Jeegaɓel Seek Beeco wiyetee ko Sohna Maam Buso Juuf. Kanko ne o jooɗii ko to Bordoo to leydi Farayse. Ko e jemma mawluud makko o o humani mo, kanko e gumminooɗo Marok o. Jeeɗiɗaɓel ( Tataɓel ɗimmel): O wiyetenoo ko Sali Pen, kono noon Seek Beeco femmbitii mo e innde hesere. Jooni o wiyetee ko Maam Buso Peen. Kanko noon ko o jannguɗo sabu ko o karallo (ingénieur en informatiŋue). E siftin’de, nde Beeco reseta mo nde, dewgal ngal waɗii dille no feewi. Ko kanko woni mo yumma mum yahnoo haa to makko ngam ñaagaade yoo oon accit ɓiyi mum hoota sabu dewgal ngal sellaani. E wiyde yumma oo, Beeco ko ko liggee ɓiɗɗo oo yoo oon rew e mum, kono hay noon hay ɓiɗɗo oo salino artude ewiyde makko kadi “o yiɗi maayde ko e sara Beeco.” Hannde noon Beeco ko kasoo woni sabu mum etaade wirnude war-hoore baɗnooɗo galle makko. Binndol Abu Gay, Lewlewal Group Networks, www.mbiimi.com Lewlewal Group Networks ina yetta yillotooɓe mbiimi.com. Miijooji mon e binndanɗe ɗe ina walla min wuurtude golle e coklaandi renndo ngoo. Tiiɗnoɗen e hokkude miijooji men e dow needi, hakkilantaagal e muñal jahdungal e yiɗde ɓamtude golle men. |
