LGN 08/05/12 So tawii hamme warnoo ko woyatnooɓe curbitagol Farba Seŋoor e laamu Wadd, ndeke haa hannde hamme ina heddii; Macky Sall, hooreejo leydi Senegaal keso oo kañum ne ardii e Farba Seŋoor mum, heddii tan noon ko farba Macky oo ɓuri hay mo Wad oo doole sabu oo ko joom ɗemngal, fitina e fetel.

Farba Seŋoor Sall e innde mum tigi rigi Mustafa Cisse Lo wolla Elpistolero wonan’de suusɓe mo iirtii kadi haala. E ndee yontere, ko haala hakkunde makko e Abuu Abel Caam nawi raay e jaayndeeji. Elpistolero, gorko Mbakke, ina tuumaa yiɗde mum fullude e maafe Macky Sall leydi sabu makko yiɗde salaade yoo Mustafa Nyass ardo suudu sarɗiiji Senegaal e dow aadi ndi Nyass aadondirnoo e Macky Sall.

Elpistolero wiyi ko tati memataa jeenayi! Alla e sago o wona hooreejo suudu sarɗiiji wolla o weeɗa Macky Sall laamu mum; ɗoon ɗo Macky Sall ina haalee fodaniino Mustafa Nyass ndeen jappeere. Wonat wonataa! Ko haa wiyee boy laawii nay wolla ko goonga e makko? Ko woni heen kala Elpistolero ina nanndi e pellitɗo, sabu ko oon coodmaami coodtumaami addi jaabondiral hakkunde makko e kalfinaaɗo konngol Makki Sall hono Abu Abel Caam haa haala ka metti.

Elpistolero yennii Abu Abel Caam e tuumde mo neɗɗo mo yiɗde heerinde caggal nde Abu ñiŋi jeeyngal Elpistolero ardaade suudu sarɗiiji leydi ndi. Abu noon ina tuumee ñaaɗde e oon bannge sabu makko meeɗde laaworaade Mahmuud Saleh jooni gonɗo jaagorɗo cirlidiijo Hoorejo leydi oo. O meɗiino riiwrude Salleh no hersinirii e nder biro Macky Sall e nder lulnde nde. Hay so Salleh kañum yahdi ko e mone, Elpistolero kañum haɓtiima sabu hannde hakkunde makko e Abu ina herƴi. Mbela Farba Seŋoor Sall maa ɗaccir Abu Abel Caam galle laamorɗo ngam yahde suudu sarɗiiji? Ndaw haala mawka sabu piɓondiral hakkunde Macky Sall e Mustafa Nyass jogori ko gasde so Elpistolero ardiima suudu sarɗiiji ndu, etee Elpistolero nanndaani e ganniyiiɗo alƴaade gacce so tawii Macky saliima toŋtude mo e ngaal jaɓɓal. Jooni heddi ko anndude: hol ko ɓurani Macky: bewnude farba mum haa seera e Nyass wolla accude bewre Elpistolero e juŋngo “jontaaɗo palais” hono Abu Abel Caam.

Binndol Isaaga Jalloh, Lewlewal Group Networks www.mbiimi.com

• Add New
• Search

Comments (0)

Write comment

Your Contact Details:

Name:

Email: do not notifynotify

Website:

Comment:

Title:

UBBCode:         -color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge

Message:

Security

Please input the anti-spam code that you can read in the image.

Joomla components by Compojoom