Lewlewal Group Networks (LGN) ||| kabaruuji Fuuta e Winndere |||
 Amerik baŋkii: Senaat hawraani e eɓɓo bata 2011 |
| Bamako: Koola Njaay warii debbo mum, ubbi e nder suudu |
| Mali: Laamu Kuluba saltiima manaaji dalli |
| Suɓngooji 2011: Lanndaaji Mali ndewii feere Benno Siggil Senegaal |
| Gammbi : Woote fuɗɗaaki, Yaayaa Jammee hawii |
Anndaama haŋkadi, goomu kalfinaaɗo njuɓɓudi suɓngooji e leydi Gammbi gaynii toɗɗaade mbiruuji jogorɗi sippirde ngam laamaade 2012. Ɓeen ngoni Useynu Daroyee mo lannda UDP e Hamaat Bah. Suɓngooji ɗii mbaɗata ko ñande 24 nowaambaru 2011 ; Jammee noon gonɗo ɗoo gila heɓti laamu e hitaande 1994 e juuɗe Jawaraa, wiyi ko kañum nawata raay, « kadi kala dilluɗo » maayi. Ɗum ko caggal nde o wiynoo kadi o wontaa dikkaade lefol laamu ngol. Hono Hamaat Bah noon won'di ko e diɗɗal lanndaaji (nayi), NRP, GPDP, NADD e PDOIS. Yahyaa Jammee jahroowo hannde e duuɓi 46 gardiiɗo lannda APRC ko kañum nawi araa-raay e suɓngooji tati ɓennuɗi ɗii. Gila e hitaande 1996 haa jooni, o iwaani e jappeere nde. Hikka kadi Jammee wiyi ko kañum nawata suɓngooji ɗii, etee jaraani boom waɗde « kampaañ », woni ƴamde wootooɓe; kadi maa fof rew laawol. Kono haaɗaani ɗoon tan, Jammee reentinii yimɓe leydi mum, sabu ndeen o huccitii e jaayndiyaŋkooɓe, hooreejo leydi Gammbi wiyi ko waɗi leydi Kodduwaar koo caggal suɓngooji waɗataa e leydi makko ; Gammbii « leydi Gammbi ko leydi jam, kisal e deeƴere. Kadi mi jaɓataa leydi ndii ina bonnee. Mi halanii on haa laaɓi." E siftin'de o waɗdiino e Useynu Darboyee mo duuɓi 63 e Hamaat Bah mo duuɓi 51 ko wonaa go'o; ngol ɗoo waɗtata laabi tati e ɓe ndikkondira. E nder leydi Gammbi fotde yimɓe 800.000 maa njeye e suɓotooɓe ñande 24 nduu lewru ; daawal ɗiɗmal alaa- Kala nawɗo raay daawol gadanal ko oon laamotoo. Binndol Usmaan Makka Lih, Lewlewal Group Networks, www.mbiimi.com Lewlewal Group Networks ina yetta yillotooɓe mbiimi.com. Miijooji mon e binndanɗe ɗe ina walla min wuurtude golle e coklaandi renndo ngoo. Tiiɗnoɗen e hokkude miijooji men e dow needi, hakkilantaagal e muñal jahdungal e yiɗde ɓamtude golle men. |
LGN
