LGN 21/10 Balɗe joyI tan pawii e maanditaare noogasiire warngo Tomaas Saŋkaraa, gooto e jammbareeɓe Afrik heddinooɓe saŋkiima e nder fitina. Oon woni Muhamaar Kadafii, laaminooɗo leydi Libii gila 1969. E ballondiral e yogo e jaayndeeji farayseeji, Lewlewal maa eto siimtan'de on ooɗoo ñalawma fitina warngo Kadafii.

Ko adii kala o anndinde yimɓe kono Muhamaar Kadafii waraama ñande alkamiisa 20 lewru oktoobar 2011 e nder wuro makko lasli, Siirte. Ɗum caggal nde dental konuyaŋkooɓe Otan boomi mo e dow ballal goomu keso CNT haɓotooɓe mo. Ndeen o waraama, gooski kii nawaa ko to jumaa Misrataa.

Ndutto-ɗen e oo ñalawma juutɗo e mbayniigu Kadafii.

12h30 (naange e hoore), waktu mo Tripolii...

Kolonel gardiiɗo konu nguu Otan nana heedi to baŋnge fuɗnaange Siirte, ɗoon ɗo Kadafii dogi mooltoyii. Ko ndeen kolonel oo habri ɓe keɓii haŋkadi wuro ngoo.

13h16 – Kumanandaŋ gooto e goomu CNT (haɓotooɓe Kadafii), gardiiɗo kooniyaŋkooɓe laamu kesu tafaangu caggal Kadafii, hono Abdel Majid, habri haŋkadi jaggugol Kadafii e gaañaade mum seeɗa ina tabiti. Hojomaaji ɗiɗi pawii heen, gooto e hoohooɓe teeŋtini Kadafii heɓaami kono ko ko barminaa ko muusi sabu koyɗe mum ɗiɗi fof gaañaade e batte kure.

Ɗoon e ɗoon kadi kabaaru keso nanaa ; o maayi, o mayaani ; ko kaŋko,  wonaa kaŋko! Kadi gooto e hoohooɓe CNT wiyi tigi sikke alaa ko Kadafii jaggaa tawii o mo yiiloo dogde ɗoon ɗo gooto e tawtoraaɓe nanngal ngal fenni mo e wiyde Kadafii wonnoo ko e ngaska, ɗoon ɗo moolinoo ɗo; ko ɗoon tigi o jaggaa.

13h42 – Ngaan saanga aayaawo tele habri kadi won'de oon kabaaru woodaani «  naŋngal wolla maayde Kadafii woodaani », e eeraango tele Al Libiyaa. Ɓe ɓeydi heen won'de kadi hay dara Kadafii wondaani, o mo wuuri, o mo selli, o mo woni e jam e kisal.

13h56 – Kumandaŋ Abdel Majid, hooreejo goomu CNT saliiɓe kadafii, felliti haŋkadi saaktude goonga mo ɓe cuuɗnoo gila adan oo. Ko ndeen o wiyi hono Muhamaar Kadafii maayii e juuɗe maɓɓe; o ruttiima e joomiiko caggal gaañanɗe muusɗe kelɗe koyɗe makko ɗiɗi ɗee fof.

14h11 - Gooto e laamɓe, hono Silbiyoo Berliskonii horeejo  leydi Itaali wiyi nih « fitina e hareeji ngasii haŋkadi to leydi Libii »

14h24 – Fedde Faraysiire ngam saakto kabaruuji hono ( L’agence France Presse), holliri natal ngal ɓe mbiyi ko Kadafii woni heen. Ina yiyee e ngaal natal neɗɗo culmiiɗo ƴiiƴam sabu gaañanɗe. Ƴetti natal ngal ko gooto e tawtoraaɓe woolde ndee ; o ƴettiri ɗum noddirngel (telefon) mum. Natal kesal ko faati e Kadifii, sabu e ɗee jonte kala hay dara nanaaka e makko. Ɗum fof tawi fedde Otan (fedde adunayaŋkoore rentinnde kaɓirɗe e kooniŋkooɓe aduna)

14h35 - OTAN  felliti haŋkadi! Otaa wiyi ko ngoonga ko kañum tigi lottii bommbooje faade e nokku Kadafii oo, e nder wuro Siirte ; kono ɓe nganndaano Kadafii nana wonnoo toon.

14h50 -  Haŋkadi arii ɗo laaɓatnoo ! Kalfinaaɗo koŋngol goomu CNT gooŋɗini maayde Kadafii. Jooni laaɓi, Kadafii warraama! Maa mawɗo jaagorɗe hono Mahmuud Jibiriil maa artu heen haa ɓeydoo laaɓde.

15h16 -  Aayaawo habrirde Al Jaɗira kañum e Al-Arabiya kabridi won'de Mo-Astasim Kadafii, gooto e ɓiɓɓe gonnooɗo laamɗo Libii kañum ne naŋngaama ; ɗum hade maɓɓe wiyde kadi o waraama, ngaan saanga nde o haɓtii e juuɗe kooniŋkooɓe Otan e CNT.

15h22 - Al-Arabiya, aayaawo kabrirde Libi, holliri kadi gooski Kadafii nawaama to jumaa Misrataa ngam mooftoyeede toon.

16h43 - Al-Arabiya fuɗɗii hollirde nate gadiiɗe e gooski Kadafii, nate ɓanndu e gaañanɗe makko.

17h17 –Ko ooɗo sahaa tigi nde Mahmuud Jibriil, mawɗo jaagorɗe laamu Libii, lomtiiɗo gila fitina oo ummii holliri ko e ɓena peewja no ɓe keɓiri ɓiyi mum Kadifii, hono Seyfi Al Islaam Kadafii ; dogɗo e oo sahaa. Ɗoon e ɗoon kadi hooreejo jaagorɗe oo holliri haŋkadi leydi maɓɓe, leydi Libii « yaltii e kiiɓal », Libii « toŋngitaama », so ɗum juuti gasata ko e ñalawma aljumaa (21 lewru oktoobar2011), wonaandu nduu.

18h24 - Al-Jaɗira  hollirii ɓideo Kadafii tawii yeeso mum ina siiwo ƴiiƴam ; ɗoon gila o mo wuuri tawo ; tawi o tampinaama. (nate jurminiiɗe)

19h22 - Jaagorgal leydi Farayse kalfinaangal ndeenka e kooniŋkooɓe, hono Seraal Loŋnget (Gérard Longuet)  woni e fiytaade becce, holliri ko bommbooje laaɗe diwooje Farayse tigi njani e konu Kadafii, haa mbarmini mo haa o maayori heen.

Caggal ɗum kaŋko jaagorɗo farayse oo, o ɓorli haala mum, so wiyde « bommbooje ɗee leydi Farayse ina njeyaa e janɓe e Kadafii e yimɓe mum » e nder diiwaan Siirte.

20h00 – Hono Marin Oliɓesi, jaayndiyanke nulaaɗo dariiɗo mo aayaawo tele France 24 toon e Libi, kañum yiyii gooski Kadafii to jumaa Misrataa. O yiyii kadi gooski Mustasiim Kadafii, gooto e ɓiɓɓe makko ; kañum ne ina nawaa e galle gooto cuɗaaɗo.

21h50 – Muhamaar Kadafii   waraama « o waraa ko e nder hare mawnde, hare fetelaaji tuccet tuccet hakkunde yimɓe makko e yimɓe ɓe goomu CNT. E wiyde maɓɓe Kadafii maayi ko caggal gaañanɗe muusɗe e kure ɗe o fiɗaa; kono ɓe meeɗaa wiyeede yoo ɓe mbar mo ; alaa. »

22h30 -  Mawɗo jaagorɗe, Mahmuud Jibiriil, hooreejo goomu CNT (riwtooɓe Kadafii) huccondiri e jaayndiyaŋkooɓe; ko e ngal kuccondiral o siimtani ɓe no warngo Kadafii yahri “ Kadafii maayi ko saanga nde min ƴetti mo, o mo nawee to safrorde ; kono tawii kure ina piɗi mo e juŋngo makko ñaamo. Nde min cuuti mo, min pawi mo e kamiyoŋ, o alaano gaañanɗe goɗɗe. « Kono ndeen oto oo fokkitii, hare kadi ummii hakkunde yimɓe makko e ɓe amen. Ko ndeen Kadafii fiɗaa e hoore. Doktoor ƴeewɗo ko wari mo ko noon waawaa wiyde so tawii ko kural konu amen, wolla tawi ko ngal yimɓe kadakii wari mo. Ko laaɓi koo tan ko anniya oo wonnoo ko sowde mo kono wari mo ko kural majjungal» e haala Mahmuud Jibriil gasniri.

Binndol Usmaan Makka Lih, Lewlewal Group Networks,   www.mbiimi.com ( e yowitaade e jaayndeeji Rfi, France 24 e Le Monde)

• Add New
• Search

Comments (2)

• 2011-10-22 12:49:11 | gaye  - duwaaw

  kala nowaawi siforaade haygooto meezaani nande vizzo libi naajo na woya heege walla baasal ngalu
  hayso wellitaare zemngal woodaani toon kam ezen nganndi ko kanko tan suusnoo dadaraade yeeso fedde ngootaagu winndere nde owiya zumen ko mbazaton koo ko fenaande o seeki zeerewol sarziiji mavve

  • 0
  • 0

  ReplyQuote

• 2011-10-22 12:53:07 | gaye

  kala noo waawri maayrude koy leydi makko kadi zoo jibinaa zo tigi o wara.
  heeferve kala kove njizi hannde oo e juulve ve kevat,kono dental afrik maa hatto so fedde nde fusaani tawa kove maalaave sabu piye mavve so wonno 100 heen 70 ko libi wazata yoo alla yurme yaafoma aan e maayve juulve.
  aamiin

  • 0
  • 0

  ReplyQuote

Write comment

Your Contact Details:

Name:

Email: do not notifynotify

Website:

Comment:

Title:

UBBCode:         -color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge

Message:

Security

Please input the anti-spam code that you can read in the image.

Joomla components by Compojoom