LGN 24/08 Hitaande kala e nduŋngu mum, nduŋngu kala e gaatareeji mum ! Hitaande fof, remooɓe, aynaaɓe e awooɓe fuutaŋkoɓe fof pawotoo ko e nduŋngu ngam wuurde ɓesnguuji mumen. Ko ɗuum waɗi, nduŋngu moƴƴo ina yiɗaa nde tawnoo heewi toɓde tan ko lebbi 3 haa nayi e nder hitaande kala. Oya baŋnge ndakaarunaaɓe kañum ne, ina keppa ko ƴiiwoole caayata e dow ko’e mum.

Hikka noon, rewo e worgo fof kawrii e daande; hay so hulanooma maa ngu famɗu doole ne, nduŋngu moƴƴii no feewi.

E haala remooɓe ɓe kaaldu-ɗen, ƴiiwoole gadane ɗee mbaɗiino kul-huli kono juko firtii ndeen maande haa laaɓi. Haa jooni ko ngonɗen e cuuluulu ko, ƴiiwoole ina njokki toɓde no haaniri. Tuggude alkamiisa 18 haa alet 22 nduu lewru (Ut), ndiyam toɓii no feewi e nder leydi senegaal. To diiwaan Maatam e konngol Kummba Bah mo rajo Tiiimtimol, toɓo ngoo heewi doole, ko ina tolnoo e 120 milimeeteer. To diiwaan Ciloñ e ko kabrini-ɗen e Aamdu Tijjaani Kan mo rajo Salndu Fuuta FM, toɓo hikka ŋakkaani haa arti noon e ɗee balɗe. E haala makko maa coñal moƴƴo ñaamoñ cakkitaaki arde kay. Ko hono noon ne kadi wayi e nder diiwaan Pete e yowitaade e kabaruuji Usmaan Aaan, gardiiɗo rajo Pete FM.

To baŋnge Muritani, toon ne toɓo ŋakkaani ɗee balɗe. E ko Ablaay Lih habri, Kayhayɗi ina ɗuuɗi ndiyam ɗee balɗe etee hokkere ina famɗi toon hikka. To Bagodiin, Feeralla, Haymedaat, Fonndu haa Ñyaabina, lappol nduŋngu ko gootol e haala Aamadu Haaraan Bah. Hay so tawii jalluɗi ɗi tawii sahaa fof ina kolla maandi soklude ndiyam ne, hokkere bonnoore waɗaani toon.

To baŋnge hirnaange leydi Senegaal, hollitaama nduŋnguu nguu moƴƴaani toon no feewi haa e nder nduu lewru Ut 2011 so wonaa saraaji Siginsoor (ziguinchoor) ɗo toɓo mawngo yuppi ko ina abboo e 204 milimeeteer e nder beetawe goote.

Hikka e yowitaade e remooɓe kañum e aynaaɓe wonɗe e nder laddeeji he, ina heewi huɗo hay so won e nokkuuji wurbooɓe wuuluunde puɗɗiima sunnude laddeeji ɗi. E tesko, e nder cimtire nduŋngu fof, ko sunnooɓe laddeeji keewi bonnude ko heewi e huɗo ko jamdi duratnoo. Reenooɓe laddeeji kono Eaux et Forets (osee fooree) en hay so tawii ina kirjina heen kaaɗdi baawɗe doole maɓɓe pamare, welsindaare e humambinnaagal ina nduña heewɓe e duppude lare ladde keewɗe haa arti e kocceeje wolla sara cooɗli cukkuɗi.

Nduŋngu nguu noon hay so fuutaŋkooɓe ina poɓɓani ngu hikka, ndakaarunaaɓe kañum ko ko pawi juuɗe e ko’e ko ɓuri heewde sabu ndiyam dammbaade e galleeji gonɗi e nappuuji kala. Ko ɗum tigi wiyetee, kala ko wonani gooto jam, wontana goɗɗo kasaara. Oon nduŋngu jaɓɓaaɗo fuuta hannde ina lammini nguurndam joom en galleeji ndakaarunaaɓe heewɓe haa kala nde ƴeewi, joom mumen ñaagotoo ko saaynde.

 Binndol Abu Gay, Lewlewal Group Networks, www.mbiimi.com

• Add New
• Search

Comments (3)

• 2011-08-26 23:09:12 | tall amadou

  eey Allah yettaama Annabi jaaraama ngam en kuliino ŋakku gol ndiyam

  • 0
  • 0

  ReplyQuote

• 2011-08-27 23:33:14 | Laamtooro  - NAYI NJARDI LAACEEJE

  Nayi njardii laaceeje. Ko kasamaas toɓan noo fuuta wona e yooro, hannde geɗeɗe koko mbayli. So yimɓe ɓe ɓuraani tiɗnaade etaariindi ndi ( environnement) ko nees jogeri saamd'e koye maɓɓe. Ko yiytaanooko watti yiyeede moni kala ena foti artirde hakkilmum gala e miskiin poti heen. Laanaka, hono tagofeere nde ko enen fof ndenndi ɗum.Anniya jolduɓi ko teeroydi e jam. Yoo jom beɗe e baawɗe waɗ en e ndeenka mum.

  • 1
  • 0

  ReplyQuote

• 2011-09-05 00:00:38 | | Ousman bah  - Lewlewal

  Aa sallamalaiy kum yo kiissal jum yorr meende woon e lenol hall pular en e wenderre he fof mi wil ti ma no fiiwe min ngond mi ko gambii

  • 1
  • 0

  ReplyQuote

Write comment

Your Contact Details:

Name:

Email: do not notifynotify

Website:

Comment:

Title:

UBBCode:         -color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge

Message:

Security

Please input the anti-spam code that you can read in the image.

Joomla components by Compojoom