LGN 18/8 Jaayndeeji Mali ko ɓuri heen heewde caakiima e kabaruuji kono yoga e majji ngartii e oon bone ñeñeteeɗo hakkunde Mali e Senegaal. Sabu ɗiɗo e maɓɓe wareede ko sakkitii ko e 47 e maɓɓe won'de e kasooji Senegaal sabu tuumeede naatnude dorog e leydi he, dognooɓe otooji Malinaaɓe ina kaala waɗde filñito e geddude yahde Senegaal. Ina wona wolla wonataa? E kuɗol Abdullaay Jara mo jaaynde "L'Independant", faddunde taƴii ɗo tokkotaako sabu gardiiɗo jaagorɗe Mali, Cuddiiɗo Mariyam Kaydara Sidibe, noddiino gardiiɗo jaagorɗe senegaal hono Sileymaan Ndeene Njaay e dow ɗuum kono wallaani no feewi sabu gila ɓe kaaldi e nder balɗe sappo ɓennuɗe ɗe, 18 woɗɓe nanngaama. Mbela maa ɗum addu punndi hakkunde Senegaal e Mali? Jaabawol ngol woni ko e juuɗe ATT e Wadd.

Jaaynde "Le Combat" kañum addi ko fitina jeyaaɓe leegal Duwansana e nder Bamako sabu maɓɓe seppude ñolo-ñolo e mbalit leegal maɓɓe. Ɗiɗo e maɓɓe ngoni ko e kasoo maa won jonte ɗiɗi sabu meer Duwansana hono Faatumata Dummbiya Kontee noddude polis e maɓɓe. Mette maɓɓe ina mawni, hannde noon ɓe ceppaani kono ɓe peŋ baasuuji,  ɓe tuŋngi buubaaji maɓɓe e yeeso joowre mbalit nde ngam hollude mette maɓɓe. E kuɗol Bureema Taraore, haala gasaani sabu dawriyankooɓe naatii e ndii ngamri.

"Le Republicain" dawri ko reentin'de dawrugol Mali fayi ko ɗo feewaani so jaggital waɗaani. E kuuñitagol Asan Kone, CENI (fedde horoore suɓngooji Mali) jogori ko tafeede tawa luutndiiɓe laamu ngalaa heen geɗal. E siftin'de mo, luural mawngal ina waɗi hakkunde laamu e luutndiiɓe mum e dow tafngo oon goomu haa luutndiiɓe ɓe ko ko ngeddi.

"Le Pretoire" ne artii e kaan haala, kono e yiyde maɓɓe, tiba Mali jappilii sabu laamu ATT ko ko ƴetti poofte ɗoon ɗo luure e caɗeele ɓuri heewan'de leydi ndi. Mbela ko ko teyaa wolla ko ko fooftaa haa hakkillaji ngarta? Ɗoon ko naamnal ngal alanaaka jaabawol.

Jaaynde "22 Septembre" maandinii Mali ko ko teeŋiraa e dawrugol mum.  Laamu e doŋke safrude ñabbuuji renndo mum, luutndiiɓe laamu e doŋke kawrugol peeje mumen. E nder ɗuum fof, hannde alaa ko heddii so wonaa wullitoyaade ñaawooɓe toowɓe leydi ndi e seerndude ko funndi hakkunde maɓɓe e laamu kono eɓe njogii njoorti "maa laamu ATT ruttoro caggal e jaɓɓal mum." Jaaynde nde kadi habrii luutndiiɓe laamu ndañii sago mumen e won e baŋnge: so dañde no doggol e windito wootooɓe Mali yuurnitoraa haa yananee mo woni kala ina winditii etee ko funndi alaa heen. E gardagol Generaal Siyaaka Sankare, hawraama e peeje no golle puɗɗorii.

Binndol Umaar Tokosel Bah, Kampala Uganda ngam Lewlewal Group Networks, www.mbiimi.com

• Add New
• Search

Comments (0)

Write comment

Your Contact Details:

Name:

Email: do not notifynotify

Website:

Comment:

Title:

UBBCode:         -color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge

Message:

Security

Please input the anti-spam code that you can read in the image.

Joomla components by Compojoom