Lewlewal Group Networks (LGN) ||| kabaruuji Fuuta e Winndere |||
 Roɓindo jaayndeeji Mali: Basiir Sinuun arnoo ko tineede; boy laawii nay |
| Roɓindo jaayndeeji Muritani: Ndaw cariindi e Muritani! |
| Roɓindo jaayndeeji Mali: Suɓngooji hooreejo Mali 2011 mbaƴƴinii barmeeji, kono dorog .... |
| Roɓindo Jaayndeeji Mali: Hakkunde nguyka cefe na’i e ruuɗo ATT |
| Roɓindo jaayndeeji Mali: hakkunde Mawluud e Saint Valentin, nuunɗal e sunaare |
| Written by Umaar Tokosel Bah on Saturday, 19 February 2011 02:53 |
L’Aube kañum huudorii ko naamnaade: mbela kuuñittooɗo ngalu Mali maa ɓooy lanngude! Siidi Sooso Jara e wallooɓe mum hannde ngoni ko e jirgitde “yeeno yeeno” , nguyka e bonan’de jawdi leydi Mali e gollirɗe mum, kono won e jaagorɗe puɗɗiiɗe ŋuurde ɓe. Siidi Jara yaltinii ciimtol golle mum; gollooɓe toowɓe laamu mbeltaaki heen sabu ngol heewde sirluuji caaktaaɗi ɗoon ɗo leyɗeele mawɗe pelliti ustude njeñcudi kopporeeje maɓɓe to leydi Mali sabu ndi tuumeede rafi nuunɗal. E kuɗol Sumayla Jara, L’Aube feññinii won’de Siidi ubbiti ko haala ka jogoraani gasde, etee o jogori ko woppude golle mawɗe caggal ɗoon ɗo o hebotoo tuuɗde jappeere makko. L’Auba kadi hollii sunaare Mali e caŋkagol Lieutenant Sammba Sangare, ngenndiyanke daraninooɗo pinal leydi e jaŋde Mali, meeɗnooɗo kadi sokeede to Tawdenni (duuɓi 10) nde Lt Muusaa Traore heɓti laamu Modibo Keytaa e 1968. Sammba Sangare sankii ko ñande 11 Febriyee to Bamako. O yahratnoo ko duuɓi 78; o woniino kooninke e laamu tuubakiri. Jaaynde Le Nouvelliste yahri ko to Dawrugol Mali: Kulubaa 2012. E kuɗol Seydu Keytaa, jaaynde nde e naamnaade: hol fof jogorɗo yahan’de ADEMA e suɓngooji 2012? Haa hannde hay huunde laaɓaani kono boli Bamako won ko puɗɗii haalde: Modibo Sidibe, Jankunda Traore, Iba Njaay wolla Seeku Jakite. ADEMA eeɓaama pecce pecce gila suɓngooji ngaraani, mo woni fof ina seekira bannge mum, kono tan Le Nouvelliste e fammin’de: lammba mawka kaa wonoyta ko hakkunde Modibo e Jankunda hay so tawii ko Jankunda ɓuri yaakoreede. Bamako Hebdo kañum ari ko ullude njaarnde e nder maafe Bamako fof no woorunoo: gila e nder galleeji haa e nder jamaaji. Tiitoonde mawnde, haala keewka, yitere hesere: Mbinndaneeji loppitooji worɓe e juuɗe jeewo galle! E kuɗol Alu Haydara, Bamako Hebdo addii jeewte kese e nder galleeji; e tesko maɓɓe sabu rewɓe galleeji nattude waɗde hay huunde (ko mbinndaneeji ndefata, nduggata , nguppata hay ngemmbeeji joom en galleeji), jooni mbinndaneeji ngontii rewɓe galleeji haa e nder yoga e galleeji joom galle waɗtii yan’de jarabi e maɓɓe. E yeruuji keewɗi ɗi ɓe ndokki, nawliigu mbinndaneeɓe wolla nih sorbo hakkunde joom galle e mbinndaan nana bonna dewle keewɗe. Bamako Hebdo haaɗaani ɗoon tan, sabu ɓe ngartii e teskaade jemma jiiɓiiɗo e nder Bamako: Jemma Mawluud leeltondirii e jemma “Saint Valentin” e nder Mali. Kamɓe e teskaade, hay so Mawluud yaawii mawnineede e nder jamaaji e dingire ne, kurusaaji e mukke mbattindoyii ko naayoyaade “Club” e sawtawol Akon e Naahaawa Dummbiya. Jaaynde nde waɗii Saint Valentin e Mawluud baalaaje ɗiɗi, Mawluud waasaaka, kono Club e Bin-bin ngeddaaka hay ndiga. Bamako Hebdo kadi e saaktude waaju Seriif Usmaan Madaani Haydara, biyɗo sariya yoo artier e leydi Mali. E haala makko to dingiral Omnisports Modibo Keytaa, bonanndeeji keewii e leydi he sabu yimɓe nattii hulde laabi laamu. E waaju Seriif Haydara, alay sago laawol sariya rewee nde bonandeeji ngustoo: “mo wari yoo ware”. Seriif kadi naati e ngardiindi laamu, so wiyde :”emin ñaagii peewal e nuunɗal mo woni kala e ko hokkaa” Roɓindo Umaar Tokosel Bah, Lewlewal Group Networks, www.mbiimi.com Lewlewal Group Networks ina yetta yillotooɓe mbiimi.com. Miijooji mon e binndanɗe ɗe ina walla min wuurtude golle e coklaandi renndo ngoo. Tiiɗnoɗen e hokkude miijooji men e dow needi, hakkilantaagal e muñal jahdungal e yiɗde ɓamtude golle men. |
LGN
