Almuugo Ngay: 02/01 Won ko kewi ko haalotaako, woppotaako kono kadi Ngay waawaa selde e haalde ɗum. Diine hannde ina yaaji, leyɗeele juulɗe ina keewi kono ndeke won ko heddii e golle. Wiɗto yaltugno ɗee balɗe hollitii won’de leyɗeele juulɓe bannge fuɗnaange Afrik ina coomi sirlu kaawniiɗo. E nder Internet, lowe ɓurɗe waawde yeeɓeede e nder ɗeen leyɗeele ko situuji waañaare rewɓe wolla nih worɓe (aahaa). Hollitaama e yowitaade e fedde ɓeto situuji adunayankooji fof, e nder lowe 100 ɓurɗe waawde areede e Internet e nder Senegaal, heen 3 ko lowe rewɓe waañiiɓe (xxx...).

Senegaal nawii toon raay kono rewo ari ɗum dow. E nder 100 lowe ɓurɗe yeeɓeede e nder leydi Muritani, heen 5 ko waañaare. Ko ɗum ndeke saabi haa almudɓe nattii paasde jaŋde, cybeeruuji fof ina keewi sukaaɓe e mawɓe. Ko ɗum ndeke maa a taw addi haa baabiraaɓe mbaɗtii daasanaade cyber feccere jemma. Ko ɗum ndeke addi haa yoga e patroŋeeɓe golle mbaɗtii uddaade nder birooji mum waktuuji tawa ngollaani hay ndiga. Ko ɗum ndeka addi haa haaa haaa haaa......welaani limde.

Aarabi Sawdiit kañum e won e leyɗeele aarabooji nde paamnoo ɗum, mbaɗti ko blokde situuji ɗiin haa hay goot waawaa yeeɓde ɗi, kono laamɓe Afrik tuuyaaka ɗum sabu maa a taw eɗum dakmani ɗum en. Jaraa boom, mate nih eɓe nganndi ko waali e galleeji maɓɓe saka ko waali e nder birooji liggorɗe leydi ndi wolla cybereeji mbeddaaji?

Kono ɗuum fof e wayde noon, ɗuum ko jam. To Anngolaa, asooɓe jaamaa njiitii toon feere hesere. Ina lolli hannde toon, mo waaldi e ɓoosaaru fof dawda e hoccude haayre jaamaa. Ko ɗuum tagi haa hannde ɓoosaaji deyi ina tiiɗi yiitude sabu ɗi ndanndoyii ko’e majji. Belaa haa e belaa haldu? Kooni ko aduna heewi ko waɗata. Kala mo yiyi haayre jaamaa, yoo siftor maa a taw ko ɓoosaaru rewdaa ɗoon.

Miin Almuudo Ngay Bah kam,mi gooŋɗinii ndeka wakkaade mi cakka jaamaa waɗanii kam tewoore. Mi añcii no kaan cakka e meere baasal saka nde nanmi ko nii yahri.

Kayram ndeke ko situuji waañaare koo ko jam!

Binndol Almuudo Ngay, mo kesi mum kaɗi kiiɗɗi mum haaleede, gorel ɗaɓɓel toowngel wulaango, lappotaako woppotaako, alaa teew saka ƴiiƴam. Mo mettini binndol am fof yoo meɓɓo newre ñamako, yartoo baagal odesawel (eau de javel), fetta wuttullo esum debbo, ŋata ɗemngal kaaw mum.

*Sabu won’de mo aawase e borijoŋ mo yahataa ko woni haaju mum, Lewlewal Group Networks ina moolanii Ngay alla etee defaaki kesi mum saka kiiɗɗi mum hay seeɗa”

• Add New
• Search

Comments (4)

• 2011-02-03 01:40:52 | | tigi  - goonga

  wazii fayiida kono bonii "needi", alaa mi haalat tan ko nii tigi lewlewal nana addi goonga, ko nii yaakaare, peeral, pulaagu ekn, foti wadde

  • 0
  • 0

  ReplyQuote

• 2011-02-03 15:05:40 | Sayku Umar BAH  - binndoowo

  Wallaay Almuudo Ngay, Ko kaalzaa ko ko goonga, kono, so a woppaani ko welmaa fof kaalaa maa mawve leyzeele ve nuunzaani ve, kippe, piymaa voggi teemedere.
  Diwaa zoo, dakkaa zoo.

  • 0
  • 0

  ReplyQuote

• 2011-02-04 20:32:57 | moussa nalla kane

  a salminaama almuudo ngay binndande ma ne laa6i kono debbo haa debbo 6osaaru ko doon woni yaa6i hattirde yo alla suur en e musiibbaaji bondi

  • 0
  • 0

  ReplyQuote

• 2011-02-13 11:54:27 | barryiso  - Gonga welani

  Gonga sono weli ne hewbe jida dum.
  Hala yurmutake,kale oto kule.
  Enene ngondi.

  • 1
  • 0

  ReplyQuote

Write comment

Your Contact Details:

Name:

Email: do not notifynotify

Website:

Comment:

Title:

UBBCode:         -color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge

Message:

Security

Please input the anti-spam code that you can read in the image.

Joomla components by Compojoom