LGN 06/01 Bamako hannde welaani. Gila alarba, laamu leydi ndi ko ko laawii caggal nde  suka Tunisi-naajo jahroowo e duuɓi 24 bulɓiti jayngol e yeeso Ambassade Farayse. Jaayndeeji Mali fof kawrii ɗoon e hello mum en adano e ɓamtude kabaaru AFP kollitɗo Basiir Sinuun yiɗnoo ko hollude yimɓe AQMI (catal Alkayda ngal o meeɗnoo jokkondirde kono maa a taw ɓeen ɗaccci mo) e hollude ɓe o mo hattani waɗde bonannde bonnde kaŋko tan e hoore makko. E ko jaayndeeji ii fof kolliti, Basiir bulɓiti ɗoon ko grenade kadi o fellii baafal galle ambassade ngal e huutoraade pistole.

Jaaynde Le Republicain kañum sikki ko Bechir ko kaangaaɗo sabu aduna bonannde grenade yawtaama; ndeke boy arnoo ko laawde na’i sabu gaañaa tan ko malinaaɓe ɗiɗo yahatnooɓe haajuuji mum en.

Jaayre L’Independent kañum ne woɗɗoyaani caggal leydi. E kuɗol Mammadu Foofana, ɓe ngarti ko e seketere ATT fayde e jaagorɗo mum tuumaaɗo nguyka booñ laamu hono Seeku Jakite, kaaleteeɗo soodi Server e innde laamu fotde 1,5 miliyaar fcfa (ndaw server!).

E ko ɓe kaali, ATT waɗtii wofde oon e ɗuurnaade ɗum. E maɓɓe kadi teskin’de ATT riiwiino jaagorɗe keewɗe ko sakkitii ko sabu maɓɓe tuumeede nguyka wolla waasde hattan’de golle maɓɓe.

To caggal leydi, jaayndeeji Mali ɓuri yahrude ko to Kotduwaar ɗoon ɗo ɗe kolli Wataraa fellitii yaltude e faandu. E ko o haali, peeje cakkaama mbela Gbagbo ina teɓɓitoo e laamu e nder balɗe garooje. Dental adunayaŋkoowal heɓtinii Watara won’de laamɗo Kotduwaar kono haa hannde ko Gbagbo jogii laamu.

Afp kollitii kadi laamu Barak Obama fenndii ngalu Gbagbo e yimɓe mum to Amerik. Ina heen Simoon Gbagbo, joom suudu makko e tato ɓurɓe ɓattaade mo hono Desire Tagro, Pascal Affi Ngesaan e Alsid Ilaahiri Jeejee.

Jaaynde Ciwara Infos kañum ari hannde ko suurtude tuundi Polis Mali. E wiyde maɓɓe, Umaar Ñaŋaadu, joom SODIMA ganndiraaɗo siiɓaade kaalis leydi Mali arii hokkude polis Mali otooji tati ngam tan ɓokkaade laamu Mali. E ko kuɗol Iisaa Santara holli, Umaar huutortoo ko kaayit mo jaagorɗo jeeyngu leydi ndi, Aamadu Abdullaay Jallo,  hokki mo ngam waasde yoɓde limpo e kala ko o naatnata leydi ndi. E ko Santara holli, polis Mali waɗaama maabuungel.

Jaaynde Le Combat kañum dawri ko faarnin’de malinaaɓe e ɓeto ɓuraa moƴƴude hooreejo e leyɗeele Afrik, ɓeto ngo jaaynde Zimbabwe wootere waɗi. E tuugnaade e laamu heen gooto kala, ATT ari ko njeetataɓe caggal: Navinchandra Ramgoolam, gardiiɗo jaagorɗe Maurice; Pedro Pires, gardiiɗo Cap Vert; Seretse Ian Khama, hooreejo Botswana; John Evans Atta Mills mo Gaana ; Hifikepunye Pohamba mo Namibi; Jacob Zuma mo Afrik du Sud; James Michel mo Seychelles .

E sakkitiiɓe, ina jeyaa heen Robert Mugabe mo Zimbabwe, Sheikh Ahmed mo Somalie, Idriss Deby Itno mo Tchad, Teodoro Mbasogo , Omar Al-Bashir du Soudan kañum Isaias Afweriki mo Erythrée  (cikkaaɗo laamɗo ɓurɗo wuuraade laamu e Afrik).

E kuɗol Jara, jaaynde Le Combat teeŋtinii won’de laamɓe Afrik fuɗnaange ɓayaani.

Jaaynde wiyeteende 22 Septembre kañum dawri ko bojji, sabu mum wiyde ATT feewjanii Mali kasaara bonɗo. E wiyde maɓɓe, ATT ittii Colonel Gammu fuɗnaange Mali ngam waɗde ɗum koolaaɗo toowɗo kooniŋkoɓe to laamorgo Kuluba. E kuɗol Paul Mben, hay so Mali fof ina anndi ko Colonel Gammu haɗi feɗɗitiiɓe heɓtude fuɗnaange Mali e juuɗe laamu, hay so gooto fof ina anndi Colonel Gammu ina jari ko ɓuri ɗum, ittude mo fuɗnaange Mali ko sakkaade feɗɗitiiɓe ngaari dewgal. E sikkitaare Paul Mben, mbela wonaa nih ɓeen ndewdaa ɗoon haa ɓe mbaawaa feewnditaade e fuɗnaange leydi ndi? Paul siftinii ko Colonel Gammu tigi loppitnoo Kidaal e Gaawo e juuɗe seɓɓitɓe tuwaareg en, ndeke ittude mo toon ko wertan’de ɓeen mbajju ɗaatɗo.

Roɓindo Umaar Tokosel Bah, Lewlewal Group Networks, ummoraade Kayes Mali, www.mbiimi.com

• Add New
• Search

Comments (0)

Write comment

Your Contact Details:

Name:

Email: do not notifynotify

Website:

Comment:

Title:

UBBCode:         -color-aquablackbluefuchsiagraygreenlimemaroonnavyolivepurpleredsilvertealwhiteyellow -size-tinysmallmediumlargehuge

Message:

Security

Please input the anti-spam code that you can read in the image.

Joomla components by Compojoom