Lewlewal Group Networks (LGN) ||| kabaruuji Fuuta e Winndere |||
| Wiɗto Almuudo Ngay: Fulɓe; on kaanga wolla on njar kanndi mbeewa? |
| Kabaruuji | Doge & wiɗtooji |
Ndeke nde wonnoo hakkunde Tuure Manndeŋ e Konde Manndeŋ, manndinkooɓe pecciima kono nde wontunoo hakkunde Sellu Pullo e Konde Manndeŋ, daande ko wootere: manndiŋkooɓe rewnooɓe e Sidiyaa oo mbaɗii gorle, kootii leydi Sunnjata Keita. Haaɗaani ɗoon tan sabu kala mo ƴeewi wattan woote Gine maa faam, Sellu dañi ko ko ɓuri 90% e nder Fuuta ɗoon ɗo Konde dañi ko ɓuri 90% e nder Manndinko-kaanee (leydi manndiŋkooɓe). So ngee woote ɓennii, hay mo meeɗaani yahde Gine ina waawi diidde kartal koɗki leƴƴi Gine; ɗo ko saare Manndiŋkoo en, ɗoo ko saare fulɓe. Hol ko ɗum firtani fulɓe Gine e fulɓe Afrik fof? Dum hollirii tan ko adii fof fulɓe Gine paamaa ko e mone ɓe ngonnoo e nder ɗii duuɓi fof. Manndinkoo en paamii ko keewal tan lamminta etee ko sabu ɓe anndude fulɓe e manndinkooɓe ina njorondiri addani ɓe yiɗde yoolde woote caggal leydi. Jooni kam anndaama, Fulɓe Gine paamii kadi so Sellu laamiima, hare ina woɗɗi gasde. Ko jooni nih nde fuɗɗii sabu maa ɓe loggu unuɗe e koyɗe laamu Sellu hono no Republicain en mbonnirii laamu Obama nih. Yaa woylak pullo daro koy, gila a hoyaani. Fulɓe Senegaal e Muritani ƴeewndoratnooɓe Gine ndañii haaju, sabu geɗe ɗiɗi:
Mi anndaa so on paamii nelal woote Gine ngal: ndadoɗee koy, laamu fulɓe heɓotaako so wonaa punndi ruuyi, mukke njaawondiri! Laamu mon noddi ko ndenton, mbaason saraade sabu pullo firtataa aadi kono Manndiŋke ina yaawi ko daaƴata hoore mum. Fulɓe Senegaal e Muritani fellitɓe rewde e jolfuɓe e safalɓe ina poti selde kaaɗi, bewre e yiɗnere koe mumen tan, ɓe caɓɓoo oo jikku manndiŋkooɓe so tawii kay pulaagu ina malaa so ɗuum alah, Goorgi Mbalax e Hammee Giduwaar njooɗoo e dow becce Sampulel Leeɓi Bey haa maayɓe nootoo woolde. Maa wood wiyɓe Almuudo Ngay yiɗaa leƴƴi goɗɗi, kono yoo joom mum hollam jiɗɗo fulɓe haa feeñi: to Gine manndinkooɓe mbii ko debbo pullo jibinaani laamotooɗo Gine, to Senegaal mere addaani haa ko tagge tan korsinaa e rajooji wolla teleeji sabu fulɓe jiɗaaɗo toon oo ko gafliiɗo ñaamo mum, to Mali ɓe toƴƴirtee kono buubi, to Muritani haala mum haalaaka tawde nde piggal ngal yehi haa muusi heen heewɓe mbaɗti ko innotoraade fulɓe-aarabooɓe (so bonii ko seernaaɓe ngadotoo yeddude alla). Jooni noon so tawii ko ɓee ngoni yiɗɓe fulɓe, kaalee gila ko law, mi fooɗta sarankullaagal am gila mi nuskaani sabu ɗii gilli ñorii ngemmbe. Binndol Almuudo Ngay, mo kesi mum kaɗi kiiɗɗi mum haaleede, gorel ɗaɓɓel toowngel wulaango, lappotaako woppotaako, alaa teew saka ƴiiƴam. Mo mettini binndol am fof yoo deŋ (ŋat) nofru esum, meernoo haa seerndooɓe ngara. *Sabu won’de mo aawase e borijoŋ mo yahtaa ko woni haaju, Lewlewal Group Networks ina moolanii Ngay alla etee defaaki kesi mum saka kiiɗɗi mum hay seeɗa. Lewlewal Group Networks ina yetta yillotooɓe mbiimi.com. Miijooji mon e binndanɗe ɗe ina walla min wuurtude golle e coklaandi renndo ngoo. Tiiɗnoɗen e hokkude miijooji men e dow needi, hakkilantaagal e muñal jahdungal e yiɗde ɓamtude golle men.
Comments (3)
Joomla components by Compojoom
|
LGN 
Nanoove vee nanii faamoove vee,kono almuudo ngay anndu dey haa hannde aza yiyaa vivve fulve ina mbiya ko enen fulve ngoni ve moxxaani zemze zee fof ko gootum fof ko zemze senegaal tan.Kono mate ve njiyaani veen kam puujortaako ngal men ngal.Almuudo Ngay jokku tiiznaare emin mbeltani maa emin caggal maa,etee anndu hay minen emin kavee hakke baawze amen.Mi okku maa zoo yeru gooto zoo e New York naatmi e bitik tawmi zoon capaato muritani o wiyimi hol to njeyazaa mbiy mi senegaal o wiyimi nangadef njaabiimi aza celli ndeke omo nana pulaar tuggi nyalnde heen fayi hannde ko pulaar min kaalaata.On njaaraama