Lewlewal Group Networks (LGN) ||| kabaruuji Fuuta e Winndere |||
| Nguurndam Baccel : Ee hey maa jahoowo, so a woodii yahde kañum e yottoyaade |
| Kabaruuji | Doge & wiɗtooji |
Ruttii Baaba Maal, Baaba mo yonteede ƴuufnaani hoore mum oo, Baaba ittuɗa men e suuɗaade e moggaade caggal gure, tammbii araaraay Pulaagu faani dow rommet aduna, Baaba artiri Jahoowo : Baccel ina siftora, ndeen o jolaani tawa e laana ndiwoowa, so Jahoowo fawaama o weeyat e miijo, o jiimta hoore mum, hoore sirŋinoo, ɗo leeɓol wonnoo e ɓanndu mum kala ummoo daroo ; sabu « jahoowo » nawdi ko gilli e yeeweende, waddi dañal e baasal, ɓamti yurmeende e yaakaare, jahoowo, so wonaano fetto mbummbaay ɓasaaɗo oo heen, Baccel ina yananaa kala Pullo keɗtiiɗo ɗum haaɗa ɗoon ! ko jahoowo waawi firtude ndeen kala e jaati, wontiiina ɓataake hakkunde Pullo e Pullo e winndere hee, jahoowo laatnooma noddirkon men hannde kon hakkunde yiɗɓe ɓamtaare ɗemngal Pulaar. Baccel haawanooma hol no aade, hayso tawii ko naalanke, holno neɗɗo e niseendi mum tuggitortoo e weeyo ngo alaa cate, ngo alaa bibje ina haala haaju mum, ina yottina nelal leñol : mo yeddi, yoo heɗto jahoowo : diwtii konngol, ko gollal timmungal e dow weeyo ; ko Baaba waawi nih waɗani men nih, enen Fulɓe. Ndeen o yeewaaka : so o yeewaama, Tijjaani wi’aɗum : Baaba emin ɗo ; so o ŋakkiraama docotte, o nokkaya e fooyre Ibraahiima Muktaar Saar wolla o saggitoyoo to duɗal Mammadu Sammba Joop (Murtuɗo), so daliilu ŋakkii, Yero Dooro Jallo wi’a ɗum haɗa jogii tigi ɗo pawɗaa, ko Mustafaa Booli ko ndeen ko e defte fawaa. Baaba nelii neldii, wullii luukii, duñii duñcii, ganii maandinii : ko ɗum tan o waawani mon, Fulɓe ! Ndeen e hannde, wonaani duuɓi noogaas, kono ellee ko deftere ko deftere hippittee koo kelle njahda e kelle kippa kelle, Pulaar hippidaa heen, neɗɗaagu men yahdi heen, darnde men ɗakkii heen no natal taarik ; bempeƴƴe e duule kaɗooje mbaɗdi adaa ko heddinoo e faandaare men ina ubba ina kollira haa ngaameela tawi men dow heen. Hannde, Baccel, so weeyii, fawa “jamɗe mbaawa” yiila hoore ñifa, heɗtoo lamtooro jeeyɗo nguurndam ngam reende Fuuta, o hersa won’de o reenaani ko ɓuri bitikel mum ngel, o heɗtoo yeewtere Yero waɗannoo ruggiyankooɓe Muritani, o miijoo de o wayri fawde koyngal mum eeleega sabu neema, neema mbo tijjaani woyannoo en ; heddorii Baccel ko heɗtaade gaaci teeru ɗi dille keewɗe, ngam yejjikinaade ko e wontaa yejjitde : worɓe njeeyii pittaali mumen ngam o wooda, kono hol ko goodal Baccel ngal alaa ittu alaa wattu nafata e ndee saare renndaande. Wollaay Baaba aguyaaji ndillii, sagataaɓe ngummaaki, min mbaɗtaama baagal ɓooyii, wollaay naane pullo hoynaama, tooroodi moɗsindi gacce ; ko mbiinoo ɗaa, aan e Ibrahiima ina bonee leñol nani e ngol nattungel wiide mbiimi sabu añde heɓtineede haɗee. Binndol Muusaa Jallo, Lewlewal Group Networks, www.mbiimi.com Tags: ina baccel mum baaba men ndeen hoore pullo heen haa jahoowo pulaar sabu alaa hannde yero jallo ɗum kala tijjaani Lewlewal Group Networks ina yetta yillotooɓe mbiimi.com. Miijooji mon e binndanɗe ɗe ina walla min wuurtude golle e coklaandi renndo ngoo. Tiiɗnoɗen e hokkude miijooji men e dow needi, hakkilantaagal e muñal jahdungal e yiɗde ɓamtude golle men.
Comments (3)
Joomla components by Compojoom
|
LGN 
Seydi Jallo fof on kaalii kono dey haa jooni en keddaaki e wiiznde, tawde Allah en rokki men hono mon en,hay onon dey ko ngolloton koo nganndee famzaani.Ko goongo won fotnoove daraade inani zaanii kono yoo Joomiraazo wazan barke eko darii koo wuuri soko rufaani.Lenyol mawngol maayataa abadah.